عوام کی جائیداد، کارپوریٹ کی حکومت اور سوئی ہوئی پارلیمنٹ


 

 "عوام کی جائیداد، کارپوریٹ کی حکومت اور سوئی ہوئی پارلیمنٹ "


پاکستان کی تاریخ گواہ ہے کہ جب بھی اس ملک میں ارکانِ اسمبلی کی مراعات، تنخواہوں میں اضافے یا شاہی پروٹوکول کی بات آئی، تو ایوان میں موجود تمام نظریاتی اختلافات پلک جھپکتے میں غائب ہو گئے۔ گھنٹوں لڑنے والے سیاستدان ایک دوسرے کے گلے لگ گئے اور بل چند منٹوں میں، بغیر کسی بحث کے، متفقہ طور پر پاس کر دیا گیا۔ لیکن جب معاملہ ایک عام پاکستانی کے بنیادی حقوق، اس کی نجی املاک کے تحفظ اور اس کی جیب پر ڈاکے کا ہو، تو ہماری قومی اسمبلی ایک ایسی 'ربڑ اسٹیمپ' بن جاتی ہے جس کا کام صرف طاقتور حلقوں اور کارپوریٹ مافیا کی فائلوں پر انگوٹھا لگانا رہ جاتا ہے۔

حالیہ "پاکستان ٹیلی کمیونیکیشن ترمیمی بل 2026" اس مجرمانہ غفلت اور عوامی بیگانگی کی بدترین مثال ہے۔

قومی اسمبلی سے انتہائی خاموشی اور عجلت میں پاس کرایا جانے والا یہ بل کوئی عام قانون نہیں، بلکہ نجی ٹیلی کام کمپنیوں کو ایک عام شہری کے گھر، چھت اور جائیداد پر زبردستی قبضہ کرنے کا قانونی لائسنس ہے۔ بل کی شقیں پڑھ کر عقل دنگ رہ جاتی ہے۔ اگر کوئی کمپنی آپ کے گھر کے باہر انٹرنیٹ کی تاریں بچھانا چاہتی ہے یا آپ کی چھت پر موبائل ٹاور لگانا چاہتی ہے، اور آپ اپنی نجی زندگی، سیکیورٹی یا ٹاور سے نکلنے والی خطرناک شعاعوں (Radiations) کے باعث انکار کرتے ہیں، تو ریاست آپ کو مجرم بنا دے گی۔ ایک عام شہری کو پانچ کروڑ روپے کا بھاری جرمانہ اور تین سال قید کی سزا سنانے کی شق اس مسودے کا حصہ ہے۔ یہ قانون نہیں، بلکہ کارپوریٹ فاشزم ہے۔

سب سے بڑا المیہ یہ ہے کہ اس عوام دشمن بل کو قومی اسمبلی سے پاس کراتے وقت کسی ایک "عوام کے نمائندے" نے بھی یہ زحمت گوارا نہیں کی کہ وہ اس مسودے کو کھول کر پڑھ ہی لے۔ ہمارے ایم این ایز کروڑوں روپے کی گاڑیاں، مفت پٹرول اور شاہانہ مراعات تو اس قوم کے ٹیکس سے وصول کرتے ہیں، لیکن جب قانون سازی جیسے اہم ترین فرض کی باری آتی ہے، تو یہ سب نکمے اور بے حس بن کر بیٹھ جاتے ہیں۔ کسی نے یہ سوال نہیں اٹھایا کہ آئینِ پاکستان کا آرٹیکل 24 جو ہر شہری کو اس کی ملکیت کا تحفظ دیتا ہے، یہ بل اس کی کھلی خلاف ورزی کیوں کر رہا ہے؟ عدالتوں کا دائرہ اختیار ختم کر کے ایک بیوروکریٹ کو الٰہی اختیار کیوں دیا جا رہا ہے؟

وزارتِ آئی ٹی اب میڈیا اور عوامی دباؤ کے بعد یہ لنگڑی لولی صفائیاں پیش کر رہی ہے کہ یہ جرمانہ عام شہریوں کے لیے نہیں بلکہ بڑی ہاؤسنگ سوسائٹیز کے لیے ہے۔ اگر ایسا ہی تھا، تو بل کی زبان میں "عام شہری" اور "نجی املاک" کے الفاظ کیوں استعمال کیے گئے؟ حقیقت یہ ہے کہ دال میں کچھ کالا نہیں، پوری دال ہی کالی ہے۔ جب ارکانِ اسمبلی بغیر پڑھے بل پاس کریں گے، تو کارپوریٹ کمپنیاں پسِ پردہ اپنے مفادات کے مطابق ہی قانون لکھوائیں گی۔

اگر الیکٹرانک میڈیا پر سینیئر صحافیوں نے اس پر آواز نہ اٹھائی ہوتی اور سوشل میڈیا پر عوام نے اس ظلم کے خلاف دہائی نہ دی ہوتی، تو یہ بل سینیٹ سے بھی خاموشی سے گزر کر قانون بن چکا ہوتا۔ یہ واقعہ اس تلخ حقیقت پر مہر ثبت کرتا ہے کہ ہماری پارلیمنٹ میں بیٹھے اشرافیہ کو عوام کے دکھوں سے کوئی سروکار نہیں۔ عوام کو اب یہ بات سمجھ لینی چاہیے کہ ان کے حقوق کی حفاظت تالیاں بجانے والے ایم این ایز نے نہیں، بلکہ ان کی اپنی بیدار مغزی اور احتجاجی آواز نے کرنی ہے۔

ندیم فاروقی 

تبصرے

ایک تبصرہ شائع کریں

اس بلاگ سے مقبول پوسٹس

زندگی کی واپسی - ایک بات ذاتی تجربہ

تصویر
  13 اکتوبر کو اچانک جسم میں ایک چھپی ہوئی بے چینی نے سر اُٹھایا۔ پیٹھ، ماتھے اور جسم پر خارش  شروع ہوئی جیسے اندرونی رگوں میں کوئی چھوٹا طوفان دوڑ رہا ہو۔ سوچا، معمولی الرجی ہوگی۔ ایک اینٹی الرجک گولی کھائی ۔ بعد میں پتہ چلا کہ وہ سٹیرائڈ تھی۔ تکلیف کم نہ ہوئی تو میں نے خود ہی Decadron اور Avil کے انجکشن مکس کر کے لگا لیے۔ انجکشن کے بعد سکون ملا، اور میں سو گیا — بے خبر اس بات سے کہ میرے جسم کے اندر ایک خاموش طوفان جنم لے چکا ہے، جیسے ایک شہر میں چھپی ہوئی آگ بھڑک اُٹھی ہو۔ اگلی صبح — خاموشی، مگر خطرناک رات بھر پیشاب کی حاجت محسوس نہ ہوئی۔ میں جو ہر رات چار پانچ بار اٹھتا ہوں، اس بار مکمل سکون میں سویا رہا۔ صبح واش روم گیا، مگر پیشاب نہ آیا۔ پہلے پہل اسے معمولی سمجھا، مگر دن ڈھلتے ڈھلتے جسم بوجھل اور دماغ خالی ہونے لگا۔ شام کو اچانک بیہوش ہو گیا۔ یہ لمحہ ایسا تھا جیسے زندگی نے اپنے ہاتھوں میں ایک چھوٹا سا امتحان تھما دیا ہو، اور میں اس امتحان میں محض ایک ناظر ہوں۔ ہسپتال — زندگی کا لمحہ بہ لمحہ امتحان جب آنکھ کھلی تو میں ہسپتال کے بیڈ پر تھا۔ اکسیجن ماس...
مزید پڑھیں

پرانے وقتوں کے علاج سے آج کے مہنگے علاج تک — کیا بدلا اور کیا ویسا ہی رہا؟

تصویر
انسان کی تاریخ اگر دیکھی جائے تو بیماری اس کا سب سے پرانا دشمن ہے۔ تہذیب کے آغاز سے آج تک انسان نے جس جس محاذ پر جنگ لڑی ہے، ان میں بیماری سب سے زیادہ دیرپا اور سب سے زیادہ سفاک ثابت ہوئی۔ فرق صرف یہ ہے کہ پرانے وقتوں میں انسان بیماری کو قسمت کا لکھا سمجھ کر قبول کر لیتا تھا۔ اور آج وہ اس کے علاج کی قیمت برداشت نہ کر پانے پر مجبور ہے۔ سوال یہ ہے کہ کیا صدیوں کا سفر ہمیں بیماری سے آزادی دے سکا، یا ہم محض ایک نئے جال میں پھنس گئے ہیں؟ پرانے وقتوں کی دوا اور دادی نانی کی الماری ہمارے گھروں میں پرانی الماریاں، لکڑی کے صندوقچے اور کونے میں رکھی شیشیاں یاد آتی ہیں۔ ان ہی میں چھوٹی سی بوتل "امرت دھارا" کی رکھی رہتی تھی جسے عرف عام میں امردارہ کہا جاتا تھا۔ یہ ہر مرض کی دوا سمجھی جاتی تھی۔  ذرا سا قطرہ پانی میں ڈال کر پلایا جاتا تو سمجھا جاتا تھا کہ پیٹ درد، نزلہ، سردرد، سب غائب ہو جائیگا ۔ بچپن میں مجھے بھی یہی" امرت دھارا" کئی دفعہ پلایا گیا ہے۔ اس کا کڑوا ذائقہ اور تیز خوشبو اب بھی یاد ہے۔ اس کے ساتھ ہی گھر کے باورچی خانے میں دوا کی ایک دنیا موجود تھی۔ ہلدی والا دودھ،...
مزید پڑھیں

سوشل میڈیا یونیورسٹی — جہاں سب پروفیسر ہیں

تصویر
  دنیا کی سب سے بڑی یونیورسٹی نہ ہارورڈ ہے، نہ آکسفورڈ اور نہ ہی کسی مشہور شہر کی کوئی پرانی درسگاہ۔ اصل یونیورسٹی تو وہ ہے جو ہماری جیب میں موجود چھوٹے سے موبائل فون کے اندر چھپی ہے۔ جی ہاں، یہی ہے “سوشل میڈیا یونیورسٹی” جہاں ہر انسان بغیر کسی امتحان یا انٹری ٹیسٹ کے پروفیسر بن سکتا ہے۔ یہ یونیورسٹی بڑی فراخ دل ہے۔ یہاں نہ داخلہ ٹیسٹ ہے، نہ فیس، نہ ہی حاضری کا جھنجھٹ۔ صرف ایک اکاؤنٹ بنائیں، پروفائل پکچر لگائیں، اور آپ اگلے دن سے کلاس لینے کے اہل ہو جاتے ہیں۔ یہ ادارہ کسی بورڈ یا تعلیمی کمیشن سے رجسٹرڈ نہیں، لیکن دنیا کی سب سے بڑی ڈگریاں یہی بانٹتا ہے۔ “ڈاکٹرآف  لائکس” ، “پروفیسر آف  شیئرز”،  "پروفیسر آف کاپی پیسٹ"، اور “فلاسفر  آف کمنٹس” کی ڈگریاں اس یونیورسٹی سے بہت ہی کم وقت میں مل جاتی ہیں۔ ٹائم لائن بطور کلاس روم اگر آپ سوچتے ہیں کہ اس یونیورسٹی کی عمارت کہاں ہے تو جناب اس کا جواب بہت آسان ہے۔ اس کے لیکچر ہال دراصل آپ کی ٹائم لائن ہیں۔ ہر پوسٹ ایک نیا لیکچر، ہر میم ایک پریکٹیکل اور ہر کمنٹ ایک viva  exam۔ یہاں بلیک بورڈ نہیں، بلکہ کی بورڈ ہے۔ ی...
مزید پڑھیں