اب میں بولوں کہ نہ بولوں


 "اب میں بولوں کہ نہ بولوں "


پی ٹی وی پشاور کے ایک زمانے کے مقبول طنزیہ پروگرام میں افتخار قیصر ایک خاص انداز سے اپنے طنزیہ اشعار سنایا کرتے تھے۔ پہلے ذرا ٹھہر کر پوچھتے:

"اب میں بولوں کہ نہ بولوں؟"

۔پسِ منظر سے آوازیں آتیں:

"بولو… بولو!"

وہ کچھ دیر خاموش رہتے، پھر دھیرے سے کہتے:

"بولا… بولا…"

اور اس کے بعد ایسا شعر آتا کہ ہنسی بھی آتی اور آدمی کو سوچنے پر بھی مجبور کر دیتا۔


آج نہ جانے کیوں وہی جملہ بار بار ذہن میں آ رہا ہے۔

اب میں بولوں کہ نہ بولوں؟

پسِ منظر سے پھر جیسے آواز آ رہی ہے:

"بولو… بولو!"

تو بولا… بولا…

کچھ دنوں سے دل میں ایک عجیب سی بے چینی ہے۔ خیبر پختونخوا میں ایک کے بعد ایک دہشت گردی کے واقعات ہو رہے ہیں۔ پولیس اور آرمی کے جوان شہید ہو رہے ہیں۔ عام شہری بھی اس آگ کی لپیٹ میں آ رہے ہیں۔ کوہاٹ میں پولیس کمپلیکس پر ہونے والے حملے میں ہلاکتوں کی تعداد 30 سے تجاوز کر گئی، جن میں پولیس اہلکار بھی شامل تھے۔ ہنگو میں بھی سکیورٹی اہلکاروں کی ہلاکت کا واقعہ سامنے آیا ہے۔ پولیس کے افسر اور جوان، فوجی اہلکار اور عام شہری جانیں کھو رہے ہیں۔ مگر ہماری سیاست کو دیکھیں تو ایسا لگتا ہے جیسے ملک کے سب سے بڑے مسائل دہشت گردی، مہنگائی اور عوام کی مشکلات نہیں، بلکہ اقتدار کی کرسی ہے۔

ادھر صوبے میں خون بہہ رہا ہے، ادھر اسلام آباد کی طرف سیاسی مارچ کی تیاریاں ہیں۔ حکومت راستے روکنے کے لیے کنٹینر لگا رہی ہے اور اپوزیشن اپنے سیاسی مطالبات منوانے کے لیے سڑکوں پر آنے کی تیاری کر رہی ہے۔

اب میں بولوں کہ نہ بولوں؟

بولو… بولو!

بولا… بولا…

صوبے میں دہشت گردی ہو رہی ہے، مگر سیاست کا پہیہ اپنی رفتار سے چل رہا ہے۔ ادھر اسلام آباد کی طرف پی ٹی آئی کی مارچ کی تیاریاں ہیں، ادھر وفاقی حکومت اسے روکنے کی تیاریاں کر رہی ہے۔ عمران خان کی رہائی کے مطالبے کے ساتھ پی ٹی آئی کے احتجاج کی کال دی گئی ہے اور احتجاج سے پہلے گرفتاریوں کی خبریں بھی سامنے آ رہی ہیں۔

اب میں بولوں کہ نہ بولوں؟

بولو… بولو!

بولا… بولا…

اسلام آباد کی طرف دیکھیں تو یوں لگتا ہے جیسے دارالحکومت نہیں، کنٹینروں کا کوئی عظیم الشان عجائب گھر ہو۔ راستے بند، مین شاہراہوں پر رکاوٹیں، اور ہر طرف یہ سوال کہ آخر حکومتیں عوام کو سہولت دینے کے لیے بنتی ہیں یا عوام کو ایک جگہ سے دوسری جگہ جانے سے روکنے کے لیے؟

ادھر خیبر پختونخوا میں سوال اور بھی بڑا ہے۔

جن علاقوں میں دہشت گردی کا خطرہ موجود ہے، وہاں حکومت کی سب سے بڑی ترجیح امن و امان ہونی چاہیے۔ وفاق نے خود خیبر پختونخوا کے 26 اضلاع کو دہشت گردی سے متاثرہ قرار دے کر وہاں تعینات افسران کے لیے اضافی سکیورٹی الاؤنس منظور کیا ہے۔ لیکن صوبائی حکومت کی ترجیحات 

کچھ اور ہیں۔

تو پھر سوال تو بنتا ہے:

اب میں بولوں کہ نہ بولوں؟

بولو… بولو!

بولا… بولا…

اقتدار کی جنگ اپنی جگہ، سیاسی اختلاف اپنی جگہ، عمران خان کی رہائی کا مطالبہ اپنی جگہ، حکومت کا احتجاج روکنے کا مؤقف اپنی جگہ۔ مگر عوام کہاں جائیں؟

ایک طرف دہشت گردی کا خوف، دوسری طرف مہنگائی کا طوفان، تیسری طرف سیاسی کشمکش۔

پٹرول اس وقت تقریباً 389 روپے فی لیٹر ہے۔ عام آدمی کے لیے یہ قیمت بھی پانچ سو سے کم محسوس نہیں ہوتی، کیونکہ پٹرول صرف گاڑی کی ٹینکی میں نہیں جاتا؛ اس کے ساتھ کرایہ، سبزی، آٹا، دودھ اور ہر چیز کی قیمت اوپر جاتی ہے۔

اور ہم؟

ہم پھر پوچھتے ہیں:

اب میں بولوں کہ نہ بولوں؟

پس منظر سے پھر آواز آتی ہے:

بولو… بولو!

بولا… بولا…

صاحب! ذرا دہشت گردی بھی روک لیجیے، مہنگائی بھی دیکھ لیجیے، عوام کو بھی دیکھ لیجیے۔

اسلام آباد کو کنٹینروں کا قبرستان بنانے سے نہ دہشت گردی ختم ہوگی، نہ مہنگائی کم ہوگی، نہ عوام کے مسائل حل ہوں گے۔

آخر میں پھر وہی سوال:

اب میں بولوں کہ نہ بولوں؟

اور اندر سے آواز آتی ہے:

بولو… بولو!

بولا… بولا…

اتنا ضرور بولو کہ اقتدار کی لڑائی 

میں کہیں عوام ہی نہ ہار جائیں۔




ندیم فاروقی 


تبصرے

ایک تبصرہ شائع کریں

اس بلاگ سے مقبول پوسٹس

زندگی کی واپسی - ایک بات ذاتی تجربہ

تصویر
  13 اکتوبر کو اچانک جسم میں ایک چھپی ہوئی بے چینی نے سر اُٹھایا۔ پیٹھ، ماتھے اور جسم پر خارش  شروع ہوئی جیسے اندرونی رگوں میں کوئی چھوٹا طوفان دوڑ رہا ہو۔ سوچا، معمولی الرجی ہوگی۔ ایک اینٹی الرجک گولی کھائی ۔ بعد میں پتہ چلا کہ وہ سٹیرائڈ تھی۔ تکلیف کم نہ ہوئی تو میں نے خود ہی Decadron اور Avil کے انجکشن مکس کر کے لگا لیے۔ انجکشن کے بعد سکون ملا، اور میں سو گیا — بے خبر اس بات سے کہ میرے جسم کے اندر ایک خاموش طوفان جنم لے چکا ہے، جیسے ایک شہر میں چھپی ہوئی آگ بھڑک اُٹھی ہو۔ اگلی صبح — خاموشی، مگر خطرناک رات بھر پیشاب کی حاجت محسوس نہ ہوئی۔ میں جو ہر رات چار پانچ بار اٹھتا ہوں، اس بار مکمل سکون میں سویا رہا۔ صبح واش روم گیا، مگر پیشاب نہ آیا۔ پہلے پہل اسے معمولی سمجھا، مگر دن ڈھلتے ڈھلتے جسم بوجھل اور دماغ خالی ہونے لگا۔ شام کو اچانک بیہوش ہو گیا۔ یہ لمحہ ایسا تھا جیسے زندگی نے اپنے ہاتھوں میں ایک چھوٹا سا امتحان تھما دیا ہو، اور میں اس امتحان میں محض ایک ناظر ہوں۔ ہسپتال — زندگی کا لمحہ بہ لمحہ امتحان جب آنکھ کھلی تو میں ہسپتال کے بیڈ پر تھا۔ اکسیجن ماس...
مزید پڑھیں

850 روپے والا پاکستان کہاں گیا؟

تصویر
 "850 روپے والا پاکستان کہاں گیا؟" سوشل میڈیا کی لامتناہی بھیڑ میں، جہاں روزانہ ہزاروں تصاویر اور ویڈیوز نگاہوں سے گزرتی ہیں، گزشتہ دنوں ایک دوست نے پبلک ورکس ڈیپارٹمنٹ (پی ڈبلیو ڈی) لاہور کے ایک کلرک، محمد اشرف، کی 15 جون 1980ء کو جاری ہونے والی تنخواہ کی ایک زرد رسید شیئر کی۔ اس تاریخی رسید پر کل رقم درج تھی: ’’850 روپے فقط‘‘۔ اس میں 650 روپے بنیادی تنخواہ، 120 روپے مہنگائی الاؤنس، 60 روپے مکان کرایہ الاؤنس اور 20 روپے سفری بھتہ شامل تھا۔ یہ محض ایک پرانی دفتری رسید نہیں، بلکہ ہماری معاشی تاریخ کا ایک ایسا خاموش دستاویز ہے جو کئی دہائیوں پر محیط معاشی تبدیلیوں، پالیسیوں اور ترجیحات کی پوری داستان اپنے اندر سموئے ہوئے ہے۔ 1980ء کا یہ 850 روپیہ ایک عام سرکاری ملازم کے پورے مہینے کا سہارا بنتا تھا۔ اس سے گھر کا نظام چلتا تھا، بچوں کی تعلیم کے اخراجات پورے ہوتے تھے، روزمرہ ضروریاتِ زندگی باوقار انداز میں پوری کی جاتی تھیں اور اکثر کچھ نہ کچھ بچت بھی ممکن ہو جاتی تھی۔ معیشت کا اصل پیمانہ رقم کی مقدار نہیں بلکہ اس کی قوتِ خرید ہوتی ہے۔ سوال یہ نہیں کہ محمد اشرف کی تنخواہ 850 روپے...
مزید پڑھیں

سوشل میڈیا یونیورسٹی — جہاں سب پروفیسر ہیں

تصویر
  دنیا کی سب سے بڑی یونیورسٹی نہ ہارورڈ ہے، نہ آکسفورڈ اور نہ ہی کسی مشہور شہر کی کوئی پرانی درسگاہ۔ اصل یونیورسٹی تو وہ ہے جو ہماری جیب میں موجود چھوٹے سے موبائل فون کے اندر چھپی ہے۔ جی ہاں، یہی ہے “سوشل میڈیا یونیورسٹی” جہاں ہر انسان بغیر کسی امتحان یا انٹری ٹیسٹ کے پروفیسر بن سکتا ہے۔ یہ یونیورسٹی بڑی فراخ دل ہے۔ یہاں نہ داخلہ ٹیسٹ ہے، نہ فیس، نہ ہی حاضری کا جھنجھٹ۔ صرف ایک اکاؤنٹ بنائیں، پروفائل پکچر لگائیں، اور آپ اگلے دن سے کلاس لینے کے اہل ہو جاتے ہیں۔ یہ ادارہ کسی بورڈ یا تعلیمی کمیشن سے رجسٹرڈ نہیں، لیکن دنیا کی سب سے بڑی ڈگریاں یہی بانٹتا ہے۔ “ڈاکٹرآف  لائکس” ، “پروفیسر آف  شیئرز”،  "پروفیسر آف کاپی پیسٹ"، اور “فلاسفر  آف کمنٹس” کی ڈگریاں اس یونیورسٹی سے بہت ہی کم وقت میں مل جاتی ہیں۔ ٹائم لائن بطور کلاس روم اگر آپ سوچتے ہیں کہ اس یونیورسٹی کی عمارت کہاں ہے تو جناب اس کا جواب بہت آسان ہے۔ اس کے لیکچر ہال دراصل آپ کی ٹائم لائن ہیں۔ ہر پوسٹ ایک نیا لیکچر، ہر میم ایک پریکٹیکل اور ہر کمنٹ ایک viva  exam۔ یہاں بلیک بورڈ نہیں، بلکہ کی بورڈ ہے۔ ی...
مزید پڑھیں