" بچہ اسکول گیا، لغت بن کر واپس آیا "


  " بچہ اسکول گیا، لغت بن کر واپس آیا "


ہمارے ہاں بچے کی پیدائش پر خوشی تو بہت منائی جاتی ہے، مگر کوئی اس معصوم کو یہ نہیں بتاتا کہ میاں! تم کسی ملک میں نہیں بلکہ ایک “لسانی لیبارٹری” میں پیدا ہوئے ہو۔ یہاں تمہارا مقابلہ نصاب سے نہیں بلکہ چار زبانوں سے ہے، جو ایک دوسرے کے پیچھے لاٹھی لے کر دوڑ رہی ہیں۔

میرا مشاہدہ ہے کہ جب ایک پشتون بچہ پہلی بار اسکول کے گیٹ میں قدم رکھتا ہے تو وہ ایک ہنستا کھیلتا انسان ہوتا ہے۔ مگر جوں ہی کلاس روم میں بیٹھتا ہے، اس پر “لسانی بمباری” شروع ہو جاتی ہے۔ سب سے پہلے انگریزی آتی ہے، جو ہمارے ہاں علم نہیں بلکہ شرافت اور ذہانت کا سرٹیفکیٹ سمجھی جاتی ہے۔ ٹیچر بڑے فخر سے کہتے ہیں:

“بیٹا! بولو A for Apple۔”

بچہ دل ہی دل میں سوچتا ہے: “یہ ایپل کیا بلا ہے؟ ہم تو اسے منڑہ کہتے ہیں۔”

ابھی وہ “منڑے” اور “ایپل” کے درمیان کوئی رشتہ ڈھونڈ ہی رہا ہوتا ہے کہ اردو کی باری آ جاتی ہے۔

“نہیں بیٹا، اسے سیب کہتے ہیں۔”

بچہ سر کھجاتا ہے اور سوچتا ہے کہ یہ چیز کھانے کی ہے یا اس کے نام یاد کرنے کی؟ اور اگر یاد ہی کرنا ہے تو تین تین نام کیوں؟ ابھی وہ اسی الجھن میں ہوتا ہے کہ دل ہی دل میں فیصلہ کر لیتا ہے کہ بہتر ہے آئندہ سے آم ہی کھایا جائے، کم از کم اس کے نام پر ابھی تک کسی زبان نے قبضہ نہیں کیا۔

تماشہ ابھی ختم نہیں ہوتا۔ شام کو اسے مولوی صاحب کے پاس بھیج دیا جاتا ہے، جو عربی میں سیب کا نام رٹوانے لگتے ہیں۔ اب آپ خود سوچیں، جس بچے نے ابھی ڈھنگ سے دانت بھی نہیں نکالے، اس کے ننھے دماغ میں “منڑہ، سیب، ایپل اور عربی” کا ایسا ملغوبہ بنتا ہے کہ وہ پھلوں کی دکان پر کھڑا ہو کر سوچنے لگتا ہے کہ خریداری کرنی ہے یا لغت مرتب کرنی ہے۔

ریاضی کا حال بھی کچھ کم نہیں۔ گھر میں اسے سکھایا گیا “یو، دوہ، درے”، اسکول پہنچا تو پتہ چلا “One, Two, Three” بھی ضروری ہیں اور ساتھ ہی “ایک، دو، تین” بھی نجات کے راستے ہیں۔ اب وہ بیچارہ پہلے انگریزی کے “Three” کو اردو کے “تین” میں ترجمہ کرتا ہے، پھر اسے پشتو کے “درے” سے میچ کرتا ہے، اور اس دوران سوال کا جواب دماغ سے “ایرر” بن کر اڑ جاتا ہے۔ آخرکار وہ اس نتیجے پر پہنچتا ہے کہ ریاضی شاید مشکل نہیں، اصل مسئلہ یہ ہے کہ سوال حل کرنے سے پہلے تین زبانوں کے درمیان امن معاہدہ کروانا پڑتا ہے۔

حکومتی ماہرینِ تعلیم کا فلسفہ شاید یہ ہے کہ بچے کو اتنا کنفیوز کر دو کہ اسے یاد ہی نہ رہے کہ اسے سائنس پڑھنی تھی یا زبانیں۔ یہی وجہ ہے کہ جب زبان کو “روٹی” سے کاٹ کر صرف گھریلو قصے کہانیوں تک محدود کر دیا جائے تو آہستہ آہستہ اس کی علمی حیثیت بھی ختم ہونے لگتی ہے۔

سچ تو یہ ہے کہ ہم نے تعلیم کو علم کی بجائے زبانوں کی ریس بنا دیا ہے۔ بچہ آئن سٹائن بنے نہ بنے، وہ ایک ایسا “موبائل ڈکشنری” ضرور بن جاتا ہے جسے یہ تو معلوم ہوتا ہے کہ پانی کو چار زبانوں میں کیا کہتے ہیں، مگر یہ نہیں معلوم ہوتا کہ پانی کن عناصر سے بنتا ہے اور اس سے بجلی کیسے پیدا کی جاتی ہے۔

آخر میں ایک مفت مشورہ: اگر آپ کا بچہ اسکول سے آ کر سر درد کی شکایت کرے تو اسے پیناڈول دینے کے بجائے اس کا بستہ کھول کر دیکھ لیں۔ وہاں آپ کو سائنس اور ریاضی سے زیادہ زبانوں کا ایسا میلہ ملے گا جہاں ہر زبان اپنی باری پر بچے کے دماغ میں تقریر کر رہی ہوتی ہے۔

تعلیمی نظام کی اصلاح کے لیے حکومت کے سامنے دہائی دینا کچھ ایسا ہی ہے جیسے کسی بھینس کے آگے بین بجانا۔ فرق صرف اتنا ہے کہ بھینس شاید دم ہلا دے، مگر ہمارے پالیسی سازوں کے کان پر جوں تک نہیں رینگتی۔

شاید اسی لیے ہمارے ہاں بچہ جب اسکول سے فارغ ہوتا ہے تو وہ نہ سائنسدان بنتا ہے نہ مفکر، بلکہ ایک ایسی “چلتی پھرتی لغت” بن جاتا ہے جو فوراً بتا سکتی ہے کہ سیب کو چار زبانوں میں کیا کہتے ہیں۔ مگر اگر اس سے پوچھ لیا جائے کہ سیب درخت سے نیچے کیوں گرتا ہے تو وہ فوراً جواب دے گا:

“سر! اس کا انگریزی ترجمہ بتا دوں؟”

ندیم فاروقی  

 #LanguageBarriers

 #PashtoLiterature

 #SocialIssues #Moth

erTongueEducation





تبصرے

ایک تبصرہ شائع کریں

اس بلاگ سے مقبول پوسٹس

زندگی کی واپسی - ایک بات ذاتی تجربہ

تصویر
  13 اکتوبر کو اچانک جسم میں ایک چھپی ہوئی بے چینی نے سر اُٹھایا۔ پیٹھ، ماتھے اور جسم پر خارش  شروع ہوئی جیسے اندرونی رگوں میں کوئی چھوٹا طوفان دوڑ رہا ہو۔ سوچا، معمولی الرجی ہوگی۔ ایک اینٹی الرجک گولی کھائی ۔ بعد میں پتہ چلا کہ وہ سٹیرائڈ تھی۔ تکلیف کم نہ ہوئی تو میں نے خود ہی Decadron اور Avil کے انجکشن مکس کر کے لگا لیے۔ انجکشن کے بعد سکون ملا، اور میں سو گیا — بے خبر اس بات سے کہ میرے جسم کے اندر ایک خاموش طوفان جنم لے چکا ہے، جیسے ایک شہر میں چھپی ہوئی آگ بھڑک اُٹھی ہو۔ اگلی صبح — خاموشی، مگر خطرناک رات بھر پیشاب کی حاجت محسوس نہ ہوئی۔ میں جو ہر رات چار پانچ بار اٹھتا ہوں، اس بار مکمل سکون میں سویا رہا۔ صبح واش روم گیا، مگر پیشاب نہ آیا۔ پہلے پہل اسے معمولی سمجھا، مگر دن ڈھلتے ڈھلتے جسم بوجھل اور دماغ خالی ہونے لگا۔ شام کو اچانک بیہوش ہو گیا۔ یہ لمحہ ایسا تھا جیسے زندگی نے اپنے ہاتھوں میں ایک چھوٹا سا امتحان تھما دیا ہو، اور میں اس امتحان میں محض ایک ناظر ہوں۔ ہسپتال — زندگی کا لمحہ بہ لمحہ امتحان جب آنکھ کھلی تو میں ہسپتال کے بیڈ پر تھا۔ اکسیجن ماس...
مزید پڑھیں

پرانے وقتوں کے علاج سے آج کے مہنگے علاج تک — کیا بدلا اور کیا ویسا ہی رہا؟

تصویر
انسان کی تاریخ اگر دیکھی جائے تو بیماری اس کا سب سے پرانا دشمن ہے۔ تہذیب کے آغاز سے آج تک انسان نے جس جس محاذ پر جنگ لڑی ہے، ان میں بیماری سب سے زیادہ دیرپا اور سب سے زیادہ سفاک ثابت ہوئی۔ فرق صرف یہ ہے کہ پرانے وقتوں میں انسان بیماری کو قسمت کا لکھا سمجھ کر قبول کر لیتا تھا۔ اور آج وہ اس کے علاج کی قیمت برداشت نہ کر پانے پر مجبور ہے۔ سوال یہ ہے کہ کیا صدیوں کا سفر ہمیں بیماری سے آزادی دے سکا، یا ہم محض ایک نئے جال میں پھنس گئے ہیں؟ پرانے وقتوں کی دوا اور دادی نانی کی الماری ہمارے گھروں میں پرانی الماریاں، لکڑی کے صندوقچے اور کونے میں رکھی شیشیاں یاد آتی ہیں۔ ان ہی میں چھوٹی سی بوتل "امرت دھارا" کی رکھی رہتی تھی جسے عرف عام میں امردارہ کہا جاتا تھا۔ یہ ہر مرض کی دوا سمجھی جاتی تھی۔  ذرا سا قطرہ پانی میں ڈال کر پلایا جاتا تو سمجھا جاتا تھا کہ پیٹ درد، نزلہ، سردرد، سب غائب ہو جائیگا ۔ بچپن میں مجھے بھی یہی" امرت دھارا" کئی دفعہ پلایا گیا ہے۔ اس کا کڑوا ذائقہ اور تیز خوشبو اب بھی یاد ہے۔ اس کے ساتھ ہی گھر کے باورچی خانے میں دوا کی ایک دنیا موجود تھی۔ ہلدی والا دودھ،...
مزید پڑھیں

سوشل میڈیا یونیورسٹی — جہاں سب پروفیسر ہیں

تصویر
  دنیا کی سب سے بڑی یونیورسٹی نہ ہارورڈ ہے، نہ آکسفورڈ اور نہ ہی کسی مشہور شہر کی کوئی پرانی درسگاہ۔ اصل یونیورسٹی تو وہ ہے جو ہماری جیب میں موجود چھوٹے سے موبائل فون کے اندر چھپی ہے۔ جی ہاں، یہی ہے “سوشل میڈیا یونیورسٹی” جہاں ہر انسان بغیر کسی امتحان یا انٹری ٹیسٹ کے پروفیسر بن سکتا ہے۔ یہ یونیورسٹی بڑی فراخ دل ہے۔ یہاں نہ داخلہ ٹیسٹ ہے، نہ فیس، نہ ہی حاضری کا جھنجھٹ۔ صرف ایک اکاؤنٹ بنائیں، پروفائل پکچر لگائیں، اور آپ اگلے دن سے کلاس لینے کے اہل ہو جاتے ہیں۔ یہ ادارہ کسی بورڈ یا تعلیمی کمیشن سے رجسٹرڈ نہیں، لیکن دنیا کی سب سے بڑی ڈگریاں یہی بانٹتا ہے۔ “ڈاکٹرآف  لائکس” ، “پروفیسر آف  شیئرز”،  "پروفیسر آف کاپی پیسٹ"، اور “فلاسفر  آف کمنٹس” کی ڈگریاں اس یونیورسٹی سے بہت ہی کم وقت میں مل جاتی ہیں۔ ٹائم لائن بطور کلاس روم اگر آپ سوچتے ہیں کہ اس یونیورسٹی کی عمارت کہاں ہے تو جناب اس کا جواب بہت آسان ہے۔ اس کے لیکچر ہال دراصل آپ کی ٹائم لائن ہیں۔ ہر پوسٹ ایک نیا لیکچر، ہر میم ایک پریکٹیکل اور ہر کمنٹ ایک viva  exam۔ یہاں بلیک بورڈ نہیں، بلکہ کی بورڈ ہے۔ ی...
مزید پڑھیں